M24 Chaffee

Lo M24 Chaffee es un carri leugier estatsunidenc concebut a partir de 1943 per corregir de problemas rescontrats sus lo M3 Stuart. Lo desvolopament foguèt rapid e la produccion comencèt en abriu de 1944. Èra un blindat relativament leugier (18,4 kg) armat dau canon de 75 mm equipant lo M4 Sherman. Pasmens, per gardar una massa totala inferiora a 20 t e lei caracteristicas generalas d'un carri leugier, lo blindatge èra feble (9,5 a 38 mm). Lo M24 intrèt en servici dins l'armada estatsunidenca en novembre de 1944 e remplacèt pauc a cha pauc lei M3. Son ròtle principau èra la proteccion dei flancs dei tropas blindadas e la reconoissença. La produccion s'acabèt en aost de 1945 e totalizèt 4 731 exemplaris. Fòrça versions e variantas existisson car lo quadre d'aqueu carri foguèt utilizat per installar d'obusiers (105 mm per lo M37, 155 mm per lo M41, etc.), de mitralhièras (sièis sus lo T77), de sistèmas destinats au despanatge, etc.

Lo M24 participèt a la Segonda Guèrra Mondiala, a la Guèrra de Corèa e a plusors conflictes de la segonda mitat dau sègle XX. D'un biais generau, mostrèt de qualitats interessantas coma carri leugier car dispausava d'una poissança de fuòc e d'una bòna proteccion per un veïcul assignat a la reconoissença. Pasmens, foguèt tanben de còps utilizat per combatre de carris pus pesucs, coma lei T-34 nòrd-coreans, amb de resultats globalament negatius. Uruguai foguèt lo darrier utilizaire dau M24 Chaffee amb lo mantenement en servici de 17 exemplaris fins a 2018.